华厦大酒店：从统战到商战的挑战
华厦大酒店，前身系1956年由广东省华侨投资公司创办嘅华侨大厦，19 5 7年开业，以接待港、澳、台人士及海外华侨为主，以贴心嘅服务博得“华侨之家”嘅美誉。1987年，中国旅行社与新加坡华侨梁氏家族合作，将华侨大厦改建成39层高嘅华厦大酒店。如今，华厦大酒店仍然喺华侨心目中有住重要嘅位置。今次，记者揾到华厦大酒店董事长、总经理莫晓晖女士同行政综合部副经理蔡启汉，了解到华厦大酒店嘅历史与现状。
配合统战，服务华侨
南都：华厦大酒店嘅前身系1956创办嘅华侨大厦，当时点解会兴建咁样一间大酒店呢？
蔡启汉：嗰时返嚟嘅华侨，每年都有超过40万人。咁多人返嚟，住宿好成问题，净系靠爱群、东亚呢啲住唔晒，所以就喺何香凝嘅直接建议同亲自倡导下，成立咗一个广东省华侨投资公司，投资250万人民币，建设华侨大厦，用嚟接待华侨。当年国民党从广州撤退嘅时候，炸断咗海珠桥，当时呢个位置成咗一片废墟，我哋啱啱好选咗呢哒地，政府好快就批咗落嚟。因为统战工作同侨务工作嘅需要，呢个系省市重点建设项目，只系用咗十个月就建成八层楼嘅华侨大厦，系全国第一栋华侨大厦，专门为港澳台同胞同海外华侨服务。广州嘅华侨大厦起咗之后，全国省会城市同二线城市，都陆续开始有华侨大厦。
南都：华侨大厦呢栋建筑有咩特色？
蔡启汉：八层楼高嘅华侨大厦，属于中式同苏式结合嘅建筑。其实华侨大厦同(中国出口商品)交易会同龄，交易会100届嘅时候，我哋啱啱好系50年。嗰阵时交易会就喺我哋对面，建筑风格都差唔多。苏式建筑当时嚟讲系好流行嘅，佢比较方正阔落，外墙正面有啲浮雕花样，下面嘅楼底，就比较有中式建筑嘅特色。
南都：1957年，华侨大厦开业嘅情景系点样？
蔡启汉：据啲“老虾饺”(意为老员工，聚会时互相称呼为“老虾饺”)讲，开业啱啱好系劳动节嗰日，比较平淡，冇搞咩庆典。因为同交易会同年，华侨大厦一开业就投入到接待交易会来宾嘅工作中，系政府定点涉外场所之一。
南都：同1930年代开业嘅老牌酒店相比，华侨大厦有啲咩唔同嘅地方？
蔡启汉：我哋会比佢哋先进啲，比如房间、走廊会比较大，内部配套好啲。因为二三十年代嘅酒店，楼梯各方面都窄，我哋嘅楼梯特别阔，而且好多幢楼梯。酒店服务方面，我哋会更加贴心周到。嗰时好多华侨返嚟中国寻亲，我哋真系好似家噉，会帮客人揾亲人，送佢去医院睇病，揾人陪埋佢，睇完返嚟帮佢煲埋药。嗰时中国穷，华侨返亲嚟，都会救济乡下啲人，行李特别多，返到嚟，只要将行李放喺黄埔港就得口架喇，我哋会包埋将行李由黄埔港运返嚟，再同佢运返去乡下，一条龙服务。华侨大厦，就系因为呢种体贴嘅服务而成为“华侨之家”。
接地气，大改建
南都：冇几耐之后，整个政治环境就变得比较复杂，呢个时期嘅华侨大厦，有啲咩变化？
蔡启汉：“文革”呢段时期好特殊，嗰阵时啲人冇心做嘢，成日搞政治斗争，影响到接待工作。但系当时交易会冇停，接待都唔能够停。所以接待工作唔畅顺嘅情况，直接反映到国务院，当时周恩来总理好重视，专门针对华侨大厦嘅接待，指示省市领导，及时作出咗调整。“文革”啱啱开始，华侨大厦改名叫做“东风大厦”，因为有周恩来嘅直接干预，冇几个月就及时改返原名。因为海外华侨对华侨大厦改名唔满意、唔适应，反映到中央，政府就下令改返，相应嘅接待亦都恢复返。
南都：改革开放之后，华侨大厦点样应对市场开放后嘅需求？
蔡启汉：当时中旅嘅领导曹裕恒总经理思想好开放，几乎系最早喺酒店引入歌厅嘅。1981年嘅时候，歌厅开始时髦起嚟，唔再系唱红歌，而系唱流行曲。但系嗰时得东方宾馆同我哋有歌厅，吕念祖最早都系喺我哋呢度驻场嘅。后来我哋仲成立咗一个歌队，其中有吕念祖、雪莹等好多1980年代好出名嘅歌星。另一方面，1980年代，华侨大厦全面向市民开放，普通市民都可以嚟华侨大厦饮早茶。呢啲都讲明咗，华侨大厦已经开始同市场接轨，唔再系单纯服务政治。
南都：莫经理喺华侨大厦改建时期就入华厦，点解会出现改建嘅契机？当时嘅领导点解会有呢个考虑？
莫晓晖：随住改革开放，国内外嘅商业经济往来越嚟越多，华侨嘅接待规模已经同时代要求有一定距离。当时广东省中国旅行社嘅领导曹裕恒总经理非常有远见，把握呢个发展契机，同新加坡爱国华侨斧头标嘅梁氏家族企业合作，将华侨大厦改建成华侨大酒店。
南都：重新开业之后，华厦大酒店有啲咩突破？
莫晓晖：1991年，15层以下已经装修好，华厦大酒店开始试业。嗰时华厦叫做“39层”，系当时广州最高嘅建筑，成为广州地标，后来先至有“63层”嘅。华侨大厦以前未有一个好正式嘅评星制度，当我哋成为华厦大酒店嘅时候，为咗使酒店可以上一个台阶，引入咗先进嘅管理理念，各方面都同国际接轨，包括环保材料、空间设计、客房配置，喺当时嚟讲都系顶尖水平。最典型嘅，就系我哋有自己嘅污水处理厂，喺环保方面做得唔错。从呢个时候开始，华厦大酒店嘅定位，就系四星级涉外旅游商务综合性酒店。
竞争激烈，重新定位
南都：近十年，广州酒店业竞争非常激烈，华厦大酒店喺而家嘅酒店业形势底下如何重新定位？
莫晓晖：呢几年广州酒店业高速发展，竞争比较激烈，好多国际品牌酒店涌入广州市场。另外，连锁经济型酒店亦都迅速发展。华厦大酒店，应该讲系属于夹心位置。一方面，我哋面对国际五星级豪华酒店品牌直接嘅冲击，另一方面经济型连锁酒店对四星级酒店嚟讲都有一定嘅冲击。因此，抓准四五星级之间嘅缝隙市场，打造一个精品商务综合型酒店，系我哋未来一段时间嘅发展定位。近几年，我哋都有一系列硬件嘅改造升级，而喺服务理念方面，我哋比较突出嘅一点，就系要畀住客一种温馨如家嘅感觉。我哋同国际奢华酒店相比嘅定位唔一样，唔需要同佢地比硬件，因为我哋希望打造一个百年传承嘅老字号，所以我哋会更注重酒店嘅历史人文。
南都：老字号呢个名头，对于一间酒店嘅发展，会唔会都有一啲压力同负担呢？
莫晓晖：坦白讲，我哋都有考虑过呢方面。老字号当然系一个好好嘅历史品牌，能够带畀顾客信心。但系作为酒店嚟讲，你要睇下点样喺唔同嘅时期赋予佢唔同嘅内涵。好多年青人可能会选择新嘅酒店，可能会觉得老字号酒店会唔会好多嘢都老气横秋呢？但系，我哋坚信，我哋有作为老字号嘅优势，就系我哋嘅历史文化同埋服务理念。其实国内外都有好多嘅老酒店经营得好好，老字号酒店系可以有佢自己本身嘅独特性，而独特性往往系成功嘅主要因素。所以老字号唔会系一种负担，问题就系要发现佢嘅内涵，同埋不断噉去赋予佢新嘅内容同观念。
南都：作为老字号酒店，华厦大酒店呢个品牌嘅价值喺边度？
莫晓晖：我觉得唔可以因为我哋唔系国际品牌，就觉得比人哋矮咗一截，当然国际品牌有好多先进嘅地方，呢个系我哋要学习嘅。但系我觉得喺学习佢哋优秀经验嘅同时，亦都要建立自己品牌活力同民族特色。
南都：56年嘅漫长岁月当中，华厦大酒店呢个字号系点样打造出嚟嘅呢？
莫晓晖：呢56年，一代代员工用佢哋对侨务工作嘅热诚，将华厦大酒店打造成“华侨之家”。华厦有一支好好嘅员工队伍，喺一代代前辈嘅努力之下，优秀嘅文化、理念得以传承，造就咗今日嘅华厦大酒店。点样喺老字号当中注入生命力，系我哋而家要面对嘅挑战。老实讲，直到今日，我哋嘅挑战仍然好大，唔敢讲话我哋已经克服晒所有困难。所以，凤凰涅槃嘅过程，系阶段性嘅，老字号必须要有一个不断接受挑战嘅心态，喺传承嘅同时，不断更新。
记者手记:老酒店嘅新人气
采访结束后，从华厦顶层餐厅坐电梯落楼，中途有一家三口行入电梯，听佢哋倾谈，知道系新加坡华侨，仔带父母返嚟广州探亲。“原来呢层有得饮茶口架，而家搬咗落去。我记得住过白天鹅、东方宾馆、中国大酒店，华厦都算唔错嘎喇……”“你返亲嚟，一开心就边度都话唔错口架喇……”“噉又唔系噉讲啊，开心系真，不过真系记得华厦以前啲服务员，出出入入好好口，叫到我四万噉口！”
所谓“华侨之家”，当然唔系斋靠口噏噏食生菜食出嚟嘅。行政综合部副经理蔡启汉，喺华侨大厦时期就已经加入华厦，呢一日嘅话题，从何香凝倡议建设华侨大厦开始讲起。华侨大厦嘅诞生，本身就以服务华侨为己任。风雨飘零于海外嘅华侨，佢哋背负离乡别井之苦，喺海外谋生亦大多处于社会底层，半生流离苦难，当佢哋踏上祖国土地，内心或者有好多嘅记挂同依恋。华侨大厦嘅理念，系为华侨提供贴心嘅服务，首先要畀佢哋家嘅感觉。听蔡经理讲，华侨大厦以前系会揾专人陪华侨去睇医生，睇完返嚟仲会煲埋药畀佢食；以前华侨返嚟嘅行李，唔使出港，华侨大厦直接派人去将行李拉返嚟，然后再帮华侨送返去乡下，可以讲得上系一条龙服务。正系由于呢种服务理念，令华侨大厦名声在外。
华厦大酒店总经理莫晓晖望落去年轻，但系听汉哥讲，莫总系从华厦大酒店开始计工龄最长嘅人，对改建后嘅华厦大酒店嘅发展了如指掌，亦系华厦未来发展道路嘅掌舵人。莫总认为，面对广州越嚟越激烈嘅酒店业竞争，华厦首先要找准自己嘅定位，华厦虽然系四星级，但系拥有好多五星级酒店都冇嘅历史文化沉淀同服务理念精华。呢啲经过漫长时间沉淀落嚟嘅嘢，就系喺一代代华厦人当中传承落嚟嘅精粹。当然，喺继承优秀传统嘅同时，华厦从来都系与时俱进嘅，诞生、改建、升级，每一步都紧跟时代脉搏。
如今，华厦仍然坐拥一河两岸，对比一众老字号酒店，丝毫不显老态，仍然沉稳大气。面对时代潮流嘅冲刷，华厦不断接受挑战。听电梯入面华侨家庭嘅琐碎话，老父依然钟意嚟住华厦，华厦可以畀佢始终如一嘅温馨；阿仔呢个年轻人亦都觉得华厦唔错，就算唔奢华新鲜，亦舒适得宜。两代人，两种观念，两种需求，要同时满足非常困难。能够靠体贴服务攞到合适嘅平衡，我谂，呢个就系华厦嘅独特之处。
(来源:南方都市报;采写：南都特约记者 冯璐赟;特别鸣谢：广州老字号协会)
