新华大酒店：背负历史创痕前行
新华大酒店，其建筑系1920年代初由有教会背景嘅嘉南堂置业公司召集华侨集资建成嘅嘉南堂。1930年，台山归国华侨谭鼎初等人联名发起向海内外集资筹办新华大酒店，1932年开业。新华位置得天独厚，服务理念先进，建筑设计风格独特，系广州最早嘅新式酒店之一，曾接待于右任等达官显贵。如今，新华系广州三间中华老字号酒店之一。今次，记者采访咗新华大酒店嘅工会主席刘春艳。
饮水思源，创办新式酒店
南都：新华大酒店开业于1932年，系由咩人创办？当时嘅缘起系乜嘢？
刘春艳：新华大酒店嘅建筑1920年代就已经建成，叫做嘉南堂，同隔篱新亚(大酒店)系姊妹楼嚟嘅。原先嘉南堂经营嘉南银行，1930年由台山华侨谭鼎初、谭伟林、李镜湖等20几人联名发动海外华侨集资筹办新华大酒店，1932年开业。佢哋当时嘅用意，应该都系饮水思源。再加上，当时西堤一带好旺，水路交通发达，商业繁荣。
南都：嘉南堂兼具岭南同西方设计风格。当时嘅设计师系点样考虑嘅呢？
刘春艳：嘉南堂系由留学美国嘅著名建筑师杨锡宗设计，系广州最早嘅一组商用高楼，高七层。酒店首层用石砌拱劵形柱廊跨建喺人行道上，建筑细部有浓郁嘅罗马风格，组成嘅骑楼又兼具岭南特色，据闻骑楼底空间系当时全国最大最豪华嘅。
南都：当时喺呢一带，新华系新式酒店之一，佢同其他酒店有咩唔同？
刘春艳：旧时凡系住得起酒店嘅客人，都系非富则贵。爱群住嘅多系达官显贵，新亚嗰边就以文人为主，而新华就系以商人为主，同埋佢有得天独厚嘅一线江景资源，所以可以有望江嘅花园套房提供畀客。
南都：听讲有个精心设计嘅花园套房，曾经接待过一啲名人。
刘春艳：当时一共有三间花园套房，其中有一间精心设计嘅中式花园套房，曾经接待过国民党要员于右任、宋子良等人。1980年代，呢啲花园套房重新设计装修过，保留咗一间以中式格调为主嘅房间。
狂澜连天，新华曾经沧海
南都：开业五年之后，日本侵华，广州沦陷。听讲有段时间，好多难民涌入新华？
刘春艳：战争爆发之后，北方人南逃广州，好多难民涌入嚟，加上好多海外华侨，一时之间客源激增。但系时间好短，好快日军就开始轰炸喇。
南都：后来，新华变成日军嘅海军俱乐部，唔对外开放，当时嘅境况系点嘅呢？
刘春艳：开头周围都有轰炸，基本上都冇乜客。后来日军占据广州，可能都睇到新华设备比较先进，就将新华变成佢哋嘅招待所。好似话二三楼都改成西餐厅，畀佢哋喺呢度吃喝玩乐。当时戒备森严，有日本兵把守，老百姓连大门都唔敢经过。
南都：日军撤走之后，新华嘅损毁情况好似比较严重。
刘春艳：系啊，日军撤离嘅时候，新华除咗建筑结构方面，所有嘢都已经损坏得七七八八。
南都：面对呢个烂摊子，当时系点样去重建，恢复新华嘅元气？
刘春艳：1945年之后，依然系嗰班台山华侨，好落力去筹钱装修。筹到钱之后要重新装修，重新组织员工，保证服务质量，同样要花好多精力。我谂都系因为有个情结喺度，摆咗咁多心血落去，想要重新开返。
南都：新政权进入广州嘅时候，新华系由边个接手口架？
刘春艳：新华原本系股份制嘅，1949年之后，佢哋对于新政权有陌生感，加上经济萧条，好多管理人员都走咗去香港，业务比较混乱，所以就由职工选出工人代表陈华暂时主持日常业务。
南都：公私合营之后，新华嘅架构同制度有咩变化？
刘春艳：1956年后实行公私合营，唔再系股份制，而系成立咗工会，由市福利公司领导，具体嘅制度完善，都系一边摸索一边转变。
南都：上世纪五六十年代有几年时间，经济形势特别困难，对新华嘅生意影响大唔大？
刘春艳：始终都有啲影响口架喇。但系当时上得一定档次嘅酒店比较少，供不应求，而且嗰阵时广交会嘅会场系喺海珠广场嗰度，以新华嘅地理位置基本唔使忧。据闻嗰阵时要嚟新华入住，都系要走后门口架。
南都：“文革”嘅时候，新华大酒店卷入时代洪流，改咗名叫做“红旗旅店”。
刘春艳：当时，酒店内部各种规章同服务规范通通废除晒，客人都要“自我服务”，自己冲水、铺床、扫地、倒痰盂。
南都：改革开放之后，新华有一个大嘅革新同转变，具体系点样嘅呢？
刘春艳：主要就系1985年，新华停业进行整体大装修。装修之后，硬件上面最大嘅提升就系中央空调。老式手动电梯亦都改成现代化电梯，一直用到亚运嘅时候，先至重新再整过。1985年装修后重新开业，招牌都改返做“新华大酒店”。
南都：重新开业几年之后，开始起人民南高架，对整个人民南商圈几乎系致命嘅。具体到对新华嘅影响，你有咩体会？
刘春艳：原本新华系龙头，高架桥将龙脉阻断，讲得大啲就系风水问题，而对老百姓生活同埋开门做生意嘅嚟讲，你起咗高架桥，光线好有问题，成个人民南变得相当昏暗，啲人生活都觉得好压抑。再加上灰尘同噪音，导致好多人都搬走晒，人民南就一年一年咁逐渐萧条喇。当时建高架桥封路，交通不便，好多客人去咗其他酒店住。做酒店就系咁，人客嚟到，肯定系以诚相待，尽量挽留你，基本上佢去咗一间新酒店，就好难再返转头。
艰难转身，匍匐中前行
南都：新华酒店评咗三星级酒店，你觉得而家嘅酒店评级制度，对于新华呢类型老字号酒店嚟讲，意义何在？
刘春艳：新华而家系中华老字号酒店，成个广州得三间。我睇到好多外国嘅老字号酒店，系直接可以评为白金五星嘅。老字号酒店有优秀嘅服务经验同人才配置，硬件反而唔系第一位。中国喺酒店评级方面，未有呢种理念同目光。
南都：但系老酒店嘅硬件生机亦都非常重要，呢个主要系靠资金实力去支撑。
刘春艳：冇错。酒店硬件方面，我哋都好注重，每年都会投入资金去改造更新。1998年我哋又大装修过一次，同银行贷款几百万嚟装修。
南都：近年咁多外资星级酒店进驻广州，老字号嘅新华大酒店有啲咩优势呢？
刘春艳：一个系我哋嘅历史文化底蕴，呢样嘢真系冇咗就冇口架啦；第二个系一线江景资源；第三个就系我哋有一批工作廿几年嘅服务员。呢啲老员工嘅服务经验非常丰富，态度热情，待客体贴，做人做事都非常周到。
南都：对于老字号嘅复兴，新华方面有啲乜嘢谂法呢？
刘春艳：我去上海和平饭店参观过，佢系由政府重点打造嘅五星级酒店，中外文化融合得非常好。广州嘅老字号酒店，同样有文化底蕴同历史价值，问题系点解打造唔出嚟呢？我认为真系要多啲宣传，同埋好好发挥酒店本身嘅文化底蕴。有传统嘅酒店，真系买少见少。
南都：酒店自身嘅创新，可能都系一个重要嘅思路。
刘春艳：而家我哋系国资委属下嘅国有酒店，一直以国有资产增值为目标。你要坚持保值、增值，就冇可能停业大装修。我哋都申请紧对比较旧嘅楼层进行大装修，融合岭南文化同欧陆文化嘅元素，配合返新华外观，令到佢有返自己本身应该有嘅文化氛围。其实新华想走小而精嘅路线，如果能够喺硬件上做到先进嘅同时，保留文化味道，系最好嘅。
南都：服务理念上，新华有啲咩需要精进嘅地方？
刘春艳：而家都系精细化管理，服务更加有针对性。首先要改变以往嘅人海战略。以前每层楼都有十个八个服务员，客人上到嚟，服务员喺电梯口迎客，开埋房间门畀佢，当时啲客人唔需要带锁匙嘅。而家基本上系逐步用电脑技术去代替人力投入，服务员要少而专。另外，以前都系家庭式服务，老一辈嘅华侨钟意多啲同服务员沟通。而家多数都系后生仔，佢哋唔钟意呢种贴身服务，反而钟意自在啲。当然，家庭式服务我哋都会坚持，我哋要求服务员多啲同客人沟通。
南都：新华经过八十几年，都经历过好多坎坷，但系佢依然喺度。作为老字号酒店，新华嘅价值系喺边度？
刘春艳：新华系不可复制嘅，佢嘅历史价值系大于商业价值。我哋都喺呢方面努力紧，发挥新华嘅历史价值，同时又提升商业价值。但系你又唔能够操之过急，唔能够霎时间将佢改成古色古香嘅酒店，只能够慢慢嚟，又要迎合返客人嘅需求。毕竟首要嘅，始终系保持国有资产增值，冇可能斋食一年唔做生意咁装修。我哋会慢慢去调整返酒店嘅整体风格，令佢符合于本来富有岭南特色同欧陆风格嘅文化氛围。另一方面，亦都希望政府能够扶持指引，大家一条心，先至可以推行。
记者手记:沧桑新华，苦寻转身机遇
呢十年间，人民南嘅商业逐渐萧条，新华大酒店嘅外墙同骑楼底，显得特别厚重。呢栋叫做嘉南堂嘅建筑，今时今日睇，仍然好有味道。罗马式拱劵设计，结合岭南骑楼建筑元素，中西融合，向来系广州建筑嘅拿手好戏。每次行过新华门口嘅巨石廊柱骑楼，都有种穿越时光嘅感觉，一时阳光照耀，一时光影昏暗，霎时间好似返到去上世纪二三十年代，意识到自己行过嘅系当时城内最豪华嘅酒店门口。
关于新华大酒店嘅历史资料，保留落嚟嘅并唔多。同刘春艳女士倾偈嘅时候，我特别想探究新华一啲历史细节。细说之下，原来新华喺八十几年嘅历史当中，可以讲系波折不断，困难重重。抗日战争时期，难民曾大量涌入新华大酒店，开房率激增，形成短暂嘅繁荣；随之而嚟，日军占据新华作为海军俱乐部，一时间日本人喺里面吃喝玩乐，醉生梦死；当日本人撤离嘅时候，将新华嘅内部损毁得相当严重，几乎成为废墟；“文革”时期，就算仍然保证一定嘅入住率，因为规章制度被废除，一片混乱；1980年代末，人民桥高架建成，西壕口商业没落，新华大酒店风光不再……
八十载风风雨雨都可以安然度过，一关关去克服，今时今日嘅境况，我着紧有深厚文化底蕴嘅新华点样复兴。新华呢个老酒店，而家畀人嘅感觉不免陈旧。刘书记话，佢亦都好希望能够着手酒店嘅硬件升级，但系要全面停业装修，喺资金上非常有难度。讲到呢一点，佢有啲无奈，同时都希望政府方面能够畀指引同埋扶持。客观条件嘅限制下，佢哋唯有更加着眼于服务嘅提升，首先要继续发挥新华成熟嘅服务理念。
其实，好多老字号都认识到与时俱进嘅重要性，问题只系在于客观因素嘅局限。有文化底蕴当然重要，但系更重要嘅系点样将历史文化价值转变成商业价值，相辅相成。新华独对珠江，珠水不断，新华如何荣盛如故？行出新华大酒店，望住门口嘉南堂作为文物保护单位嘅牌匾，我希望，新华大酒店嘅价值，并唔系净系一块牌匾。
(来源:南方都市报; 采写：南都特约记者冯璐赟;特别鸣谢：广州老字号协会)
